ZUMAIA – GETARIA – ASKIZU

Txusma Perez Azacetak txakolin-mahastietatik barrena doan Zumaia-Getaraia ibilbide zirkularra proposatzen digu hilabete honetarako. Gozatzeko txangoa.   

Gipuzkoako txakolinaren bihotzean barneratzen gaituen txango interesgarria. Ibilbide zirkularra da eta Gipuzkoari itzulia ematen dion ibilbide handiko bidezidorra erabiltzen du Getariara hurbiltzeko. Itzulera Askizu auzo ederretik igarotzen da Donejakue Bidean zehar.

Zuloaga Museotik abiatu

Ibilbidea Santiago hondartzaren inguruan dagoen Zuloaga Museoaren ingurutik abiatzen da. Getariarantz doan errepidea zeharkatu eta GR 121aren marra gorri eta zurien erreferentzia hartuko dugu. Igoerari hormigoizko pistatik ekingo diogu. Malda eramangarriago bihurtzen denean, eukalipto baso baten ondotik joango gara. Laster lehenengo txakolin-mahastietara iritsiko gara, ibilbide osoan zehar errepikatuko den tonika. Askizuko lehen baserria ia ukituz, eskuinera biratu igoera gogor bati ekiteko eta goialdetik gure ibilbidea jarraitzeko. Hainbat bidebanatze aurkituko ditugu, baina beti marka zuri-gorriak jarraituko ditugu. Garateko gainera (282m) iritsi baino pixka bat lehenago Arriaundiko tumulutik igaroko gara. Errepidea zeharkatu eta aurrera jarraituko dugu, Elkano upeltegiaren ondotik pasatuz, Zarautzetik datorren pista asfaltatuan itsasoratu aurretik. Une honetan Donejakue Bidearen zati bat egiten ari gara, eta ez dugu amaierara arte utziko.

Mendi-mazelaren erdira jaitsiko gara, mahastien artean. Itsasoan barneratzen den San Anton mendi txikiak, Getariako sagua izenez ezagutzen denak, atentzioa emango digu.

Txakolinaren bideari jarraituko diogu, Getariarantz doan errepidean behera. Hilerriaren ondoan ezkerretik jarraituko dugu porlanezko pista batetik. Akarregi Txiki sagardotegia atzean utzita, ezkerrera egingo dugu Askizuko galtzadatik jarraitzeko. GI-3392 errepidera iristerakoan, auzorantz jarraituko dugu. Handik gutxira, errepidea utzi eta Asti baserritik Askizuko San Martin elizara iritsiko gara (100 m). Aterpetxea alde batera utzi eta arrasto horiak jarraituko ditugu, baserri pare baten ondotik igaro eta eskuinetik jarraitzeko. Horrela, lehen etorri garen GR-arekin elkartzen gara. Zumaiarako jaitsiera igotzeko erabili dugun bide beretik egingo dugu.

Gida praktikoa

Denbora: 3h 15 min

Distantzia: 11,8 km

Desnibela: 350 m

Zailtasuna: erraza

Sarbidea: Zumaiara kostako errepidetik (N-634), A-8 autobidetik eta trenbidetik (Euskotren) iristen da.

Mapa: Ernio – Izarraitz Pirinioetako koadernoak. Sua Edizioak. 1: 50.000 eskala.

Argazkiak: Txusma Pérez Azaceta